وقتاش ؟

[Fitouri Driss]

وقتاش انوليو أحرار ؟
وقتاش ما عادش نمنوا بسيدي بودرباله ؟
وقتاش ماعادش نمنوا بسيدي الشيخ ونصايحو وعلمه ونهاب لحيته الكثه ؟ وقتاش انحيو من حياتنا التشاؤم والتفاؤل ؟ وقتاش نوقفوا عل ساقينا وانحلوا مشاكلنا بيدينا ؟ وقتاش نمنوا بحترام العمل والانتاج وماعادش نهربوماخدمه ؟ وقتاش نتعودوا على دفع ضرائبنا بدون تهرب ؟ وقتاش نبطلو الشراء بالكردي ؟ وقتاش يكون العرس كيما في أوروبا ساهل ماهل وبدون تكاليف باهضه ؟ وقتاش الطبيب التونسي يكون همه علاج المريض موش كسب المال والكليونات ؟ وقتاش المحامي التونسي يخطى الكذب والمرواوغه ويكون همه خدمة حرفائه موش لمان المال وشريان العقارات ؟ وقتاش يبدى عندنا مقاولين ما يغشوش في خدماتهم ؟ وقتاش تبدى عندنا مراقيه و متايعه في البلاد؟ وقتاش الصحافي التونسي يكون في المستوى ؟ وقتاش اتكون تلفزاتنا فيها روح خفيفه وذكاء مش برامج اتبكي ؟ وقتاش القاضي التونسي يكون شجاع وحر وكفء ؟وقتاش نحترموا ونعطي حق بعضنا بعض؟ وقتاش البلاد تبدى فيها كفاءات وطنيه قادره على خدمة البلاد ؟ موش اسفاش مخبيه تحت الخجل واللا مبالات والاهتمام بتدوير الصوابع وتدوير الزرو ولمان الأموال خلال وحرام؟ وقتاش يولى عندنا في الشوارع فنيين يصلحوا الأجهزه المعطوبه بذقه وسرعه ونظافه مش يصلحوا بقعه ويكسرو بقعة أخرى ؟ وقتاش يولي عندنا قراجات تعرف اتصلح الكراهب مش تعدم في الكراهب؟ وقتاش نعول عن قطاع الخدمات ونكرى للسكنى أمحال عوض عن تكبد البناء وشراء الأراضي قادر والا مش قادر وقتاش ننتهوا من أعمل كيف جارك والا حول باب دارك ؟ وقتاش تبدى عندنا أحزاب وبرامج اصلاحيه مش أحزاب انتهازيه تعمل العار؟ وقتاش يبدى عندنا بوليسيه كلهم انظاف وما فيهمش من يقبض الرشوه ؟ وقتاش يبدي عندنا تجارما يغشوش في بضاعتهم والأسعار ؟ وقتاش المرأة التونسيه تنحي مركب النقص من دماغها والرضاء بالدون ؟ وقتاش في علاقاتنا يصبح العقل يطغى على العاطفة ؟ وقتاش نتعودوا عالدم البارد ونكون أصحاب منطق ؟ وقتاش اتكون محادثاتنا فيها محتوى مش شنوه حوالك لاباس شنوه حالك لا باس والا أنا طيبت أنا طبخت أنا شريت ؟...وقتاش نعرفو انربو أنفسنا ونربو أبنائنا ؟ وقتاش انولو ناكلو السلايط الرخيصه ونقللو من تخمة الكسكسي والمقرونه ؟ وقتاش التونسي يتخلص من سعر الهباط في سوق الجمله وينجم ياكل الغله؟ وقتاش تتحسن نوعية الخبزفي بلادنا في الهشه والبنه والخفه ؟ وقتاش قطاع النسيج يتطور ويقدم لنا أقمشه منوره عصريه مش داكنه وكئيبة الالوان ؟ وقتاش تتطور الفنون ويقبل عليها التونسي ؟ وقتاش توفى الحكومه من الكذب ؟ أو وقتاش نوفا أنا العراك مع مــرتي ؟